أطفــال الشــوارع
يا أهل بلدي
ياللي دفنين وشـُّكو جوه التراب
بصوا حواليكم شويه
شوفوا أحوالنااللي صارت
كلها زي الهباب
شوفوا أطفال الشوارع
حقها في الدنيا ضايع
أد إيه أصبح عددهم كل يوم في كل شارع
إللي قاعِد واللي نايم
واللي لابس واللي قالِع
واللي جنب كوام زباله
فارش الاكياس بياكل أي لقمه يلتقاها
بعدُه واحِد تاني ييجي
ثمَّ تالِت ثم رابع
ييجي واحد برضه خامِس
بعدُه سادِس بعدُه سابع
كلهم أطفال شوارع
ملمومين زي الدِيابه
أو كِلاب شارده وضاله
أو قطط ملهاش هوِّيه
أصلهم فعلا ً غلابه
العيال تقعد وتاكل أي حاجه م الزباله
حاجه نيه أو رديه
بس سُبحان اللي حافِظ
صحه جامده .. مِيه مِيه
ــــــــــــــــــــ
لو يشوفوا واحده هانِم
حاجه شيك ماشيه بألاطه
يلحقوها ويقولولها .. حَسَنه من عندك يا خاله
وان تجاهلِت واشمئزت يلزقولها بالهباله
رايحه مِشوار تِقضي حاجه
واما ترجع يقفولها ملطوعين فوق السلالِم
تصرخ المسكينه خايفه من عيال آخِر سفاله
فجأه فص ملح دابوا
قبل إثبات أي حاله
تيجي شرطه ويسألوها
( ليه عملتي الافتِعاله ؟ )
تِبكي وتقولها بدموعها ( حتى إنتم يا عداله ! )
يجمعولها تلتميه كلهم أطفال حُثاله
كلهم نظرات حزينه فيها ذله وابتِهاله
شكلهُم مِن طينه واحده والوجوه نفس الملامِح
شافِت الشرطه حيرتها نقوا منهم وش كالِح
يسألوه ليه راح لبيتها
قال ( بساعِد عم جابر ..أو بساعد عم صالح )
ــ إسمك الكامِل يا شاطِر ؟
ــ معرَفوش خالِص يا باشا .. العِيال سموني فالِح
أصل بافهم كل حاجه
سٍجِّلوا المحضر وقالوا
ده بلاغ فيه افتِعَاله
المدام رجعت لبيتها مُحبطه تقول ( استِحاله !!! )
ـــــــــــــــــــــ
وقـِّفوا عربيه ماشيه
متقولوش ماشيين ف حاشيه
يسألوا السواق وهما بيمسحوا بفوطه الإزاز
يعني نوع م الابتزاز
لو يرُد يقول بلاش
يسمع اللي ميتنساش
والشتيمه تكون بذيئه
ماليه وشـُه بالرزاز
ــــــــــــــــــ
دوله سايباهُم كده وكأنها من غير نظر
يعني أطفال الشوارع
صنف مِن غير البشر
أو مفيش منهُم خطر
طب يا دوله لما يكبر طفل بايع جتته
يبقى مُجرم أو حرامي
أو مشضـَّب حِتِتـُه
يبقى نرجع تاني نندم
عن فـُرَص ضاعِت هـَدَر
ــــــــــــــــــــــ
لا يا قاعِد جوه مكتب
مُنتظِر كارثة قدَر
ييجي تقرير عن مُصيبه
تِدِّي رأيَّك في الخبَر
ليه تِبان أو تِنشـَهَر
قوم يا شيخ سيب مَكتبك
روُح وبُص على العِيَال
شوف أمُورهم لِمُّهُم
كوُن معاهم وابتسم
يكشفولك سرُّهُم
كون لهم أسره ووطن
شوف لهم فرصة عَمَل
راح يحسُّوا بالاعتِزاز
يخدوا أحضانك مكان يملا حياتهُم بالأمل
دُوُلـًه أطفالنا وعُزاز
دوله ثروه بس مِتصَابه بشلل
تـُستـَغل حتجني خير
يبقى مِنهم المُدير
برضه منهم الوزير
غير كمان أكبر عدد
مِنهُم يكون عامِل أجير
لو خدتـُهُم علـِّمتـُهم وغرزت فيهُم الانتِماء
مِن بعد ما كانت عيال متشرَّدَه زي الوباء
راح تبقى جددت الأمل
ومَنعت توربيني يحاول يرتدي توب الأمير
يلبَد يعشِش في العقول
وساعِتها كل الناس تقول
ليه سيبتوا أطفال الشوارع
زى بركان هادي خامِل بس جواه لسه والِع
غلـُّهُم يكبر معاهُم
يبقوا زي القنبله
موقوته جاهزه تِنفجر
علشان تدَّمر في البشر
والغِل يملا قلبهُم يبقى شديد زي الحجر
وبدال ما كانو بالغتاته
ضايقوا ناس من غير خطر
دول مش بعيد راح يبقى واقِع
أنهم يملوا النواصي
يقفلوا كل المواقِع
بالقنابل والمدافع
يومها إنتو الخسرانين
ــــــــــــــــــــــ
نفسي أأدِن يوم في مالطه
والقىَ واحِد بس سَامِع
دَوله فيها الوزرا طايحه
ملبِّسه الناس البراقِع
حللوا دستور ولايحه
مِن ورا ضهر الشرائع
فيه كمان ابو دم سائع
كل يوم تلقاه ينافِق في البشر
قدام أميرُه ينحِنِي
ويقول ( يا رائع !
إنت جيت ومليت حياتنا بالروائع !!!
لا اشتكينا من العَدم
ولا حتى فينا حد ضايع )
يبقى دا راجل منافق
بالكلام يضرب مدافِع
واحنا ناكل م الزباله
زي أطفال الشوارع !
******************
موضوع: أطفال الشوارع 
الجمعة يونيو 26, 2009 8:44 pm