بين غصون الزيزفون
فوق الروابي
بين غصون الزيزفون
التلج فارش طرحِته
والبرد نايم ف العيون
الورد خانقاه دمعته
والزهر مِتأثر حزين
والكون مِداري خـُضرته
تحت الجليد
الناس كتير مع بعضها
ماليه الشوارع والمُدن
لو جيت تخـُش ف قلبها
أو تِطـِّلِع على سِرَّها
حتلاقي كلـُه ف بلوته
عايش في كون وحدُه وحيد
ــــــــــــــــــــــــــــــــ
لفـيِّت بلاد
شـُفت العِباد
بيقابلوا بعض بدون سلام
البيت قصاد البيت قريـِب
لكِن قلوب الناس بُعاد
قاعِد حزين مع غـُربـِتي
والوحده ماليه دنيتي
في بلاد تِداري كِدبها على نفسها
بنوادي ليل فيها المُجُون
وفجور مِعشـِّش في العيون
وخيانه كامنه ف قلبُهم
والخوف مرابط زى ديب
وان كنت قاعِد وسطـُهم
تِحتار في بسمه منـُّهم
دي مِن عدو واللا حبيب
ــــــــــــــــــــــــــــــ
عايش يا ناس في غـُربـِتي
بين البشر منبوذ غريب
مشتاق لبلدي وقريِّتي
مشتاق لنيل مصر الحبيب
مشتاق لحُضن يضـُمِّني
بحرارة لما نلتِقي وأحِّس نفسي مش غريب
.... ملقيتش غير حُضنِك يا مصر
فيها البشر مِتفرَّقه .. لكِنْ حبايب
وكأنهم مِن عيله واحده
مفرَّعين مِنها القرايب
يتجمَّعوا زى الطيور على قلب واحد ف المصايب
الكل بيشيل جنب اخوه
خايف عليه
وكأنـُه أمُه أو أبوُه
ـــــــــــــــــــــــــــــ
رغم المصاعِب والمصايب والمِحَن
معشوقه جوَّه القلب مصر
مهما أهاجـِر
أو أسافِر أو أغيب عن حُضنها
أرجع لها مليان بشوق
وأبُّص فوق
ألقى سماها فيها شيء بيشدِّني
خايفه عليا من السفر والاغتراب
لاصبَحْ غريق
ف محيط كبير مليان ضباب
وافضل بعيد عن قـُربَها
ـــــــــــــــــــــــــــــــ
وسط الجليد
والدم هربان في الوريد
مع دمعه واقفه مجمده فوق الخدود
الفِكر سافِر عند بلدي وأهلها
يرسم صور مِن أرضها
صورة جمال الريف وصورة شعبها
صورة سواقي تغني غِنوه بلحنها
والنخل مال علشان بيسمع حِسَّها
صورة بنات النيل جميله بحُسنها
فيها سمار فيها أمُومة أمَّها
مفهاش جليد
مفهاش برود
ولا فيها جُرأه تعِرَّها
صورة شباب هادى وودود
لكِن ف وقت الشِدَّه تلقاهم رجال زي الأسود
هُمَّا كِده زى الجدود
مِن عهد رمسيس البطل
أو عهد أحمس اللي قام طرد اليهود
ـــــــــــــــــــــــــ
مُشتاق لِبَلدي وحُضنهَا
مشتاق أشوف النيل بيجري
بين بيوتها وأهلها
مشتاق أدوق ميِّتها تاني وانتِشي مِن طعمَها
نفسي أعودلِك يا بلد
دى الغـُربَه صعبه مِستحيل فيها الجَلـَد
نِفسي أعود م الزيزفون
دا الهجر أكتر مِ الجنون
*************
موضوع: بين غصون الزيزفون 
الأربعاء يوليو 15, 2009 7:22 pm