الغربة

الغــُــربه





الغـُــربه مش بس البُـعـــــــاد


عن أرض مصر ونهرهــــــا


الغربه يصْنعها الفســـــــــــاد


اللِي معذ ِّب أهلهـــــــــــــــــا


ممكن نكون جوه البـــــــــلاد


عايشين على تراب بَرَّهـــــــا


والظلم طايح في العِبـــــــــاد


واللقمه حاسين مُرَّهــــــــــــا


لو قلنا حي على الجهــــــــاد


علشان نحرر أسْرهــــــــــــا


يطلع لها من غير ميعـــــــاد


خاين ويفتِش سِرّهـــــــــــــا


والناس تعيش جوه البــــــــلاد


حاسَّه بغربه تجُرَّهــــــــــــــا


لحياه ملانه بالسُهـــــــــــــــاد


ولموت أمل من قهرهـــــــــا


غربه وبتخللي البـــــــــــــلاد


حاسّه بنهاية عصرهــــــــــا


يئِسِت عشان الظلم ســـــــاد


ضيَّع معـــالِم فخرهــــــــــا


لقِت الخسيس بالشر عــــــاد


لابـِس ومِتز ِّيـِّن لهــــــــــــا


عامِل عريس وكأنه جــــــاد


شايل زكايب مهرهـــــــــــا


مليانه للآخِر فســــــــــــــاد


وحاجات كتيره تضـُرَّهــــا


يارب تِصحَىَ من الرُقــــاد


تِخلع لِجـــام بيجُرَّهـــــــــا


وتقوم وبشوية عِنــــــــــاد


تِرْجع تِلملم شملهـــــــــــا


دي الغربه لو جوه العِبـــاد


ملهاش مثيل يشـْبـِه لهـــــا





**********