الجــــــــــيره
أفراح بلدنا أفراح جميـــــله ............ محلاها فرحه محلاها ليلــــه
فيها الغناوي فيها المدايـــح ............ تِسعِد قلوبنا تخلينا
عيلـــــــــه
ـــــــــــــــــــــ
الكل حاضِر وبقلب راضى .......... علشان يبارك وعشان يراضي
ياهل العروسه فين الدبايح............ لاجل النهارده مش يوم وعادي
ــــــــــــــــــــ
عاده ف ريفنا واخدين عليها ............ كل الحبايب ملزومه بيهــــا
تبقى المناسبه والكل رايح ............ من غير عزومه تلقانا فيهـــــا
ـــــــــــــــــــ
والكل أسره والكل عيلــــه ........... الجيره بينهم راسخه وأصيلــه
لو فاح طبيخهم طلـَّع روايح .......... يبعت لجاره م الصنف شيلـه
ــــــــــــــــــــ
دا سِلـْوْ غالي مزروع في ريفنا .... وضيوف جيراننا هُمَّا ضيوفنا
وان كان مُصيبه أو كان فضايح .... مع جارنا نقف فاردين كفوفنا
ــــــــــــــــــــ
يااهل المدينه مالكومش جيره ......... الكل عايش وحده ف جزيره
والحِقد أصبح في قلوبكو طافِح ......... وعيونكو دايمًا مليانه غيره
ـــــــــــــــــــــ
لو جت مصيبه مِسْكِت في جارك .. أو جار ف أزمه جه واستجارك
تهرب وتهجر كل المطارح .... وتفوُت بجلدك فرحان بعــــــــــارك
ـــــــــــــــــــ
دي الجيره وصَّىَ بيها الرسول ........... خللىَ الحواجز بيننا تزول
واللي يصونها هوَّ اللي فالِح .......... علشان رعاها حسب الأصول
***************
موضوع: الجيــــــــــره 
الخميس يوليو 23, 2009 12:57 pm